1 Ya mere, ọ buru na unu soro Kraist-ayi bilikọ, nāchọnu ihe di n’elu, ebe Kraist-ayi nọ, nānọdu n’aka-nri Chineke.

2 Tukwasinu uche n’ihe di n’elu, ọ bughi n’ihe di n’elu uwa.

3 N’ihi na unu nwuru anwu, ezowo kwa ndu-unu n’ebe Kraist-ayi nọ nime Chineke.

4 Mb͕e ọ bula agēme ka Kraist-ayi puta ìhè, Onye bu ndu-ayi, mb͕e ahu ka agēme kwa ka unu onwe-unu so Ya puta ìhè n’ebube.

5 Ya mere, menu ka ihe nile di unu n’aru nke di n’elu uwa nwua; ikwa-iko, adighi-ọcha, ọchichọ ọjọ, agu ihe ọjọ, na anya-uku ahu, n’ihi na nka bu ikpere arusi;

6 ọ bu kwa n’ihi ihe ndia ka iwe Chineke nābiakwasi umu nke ekweyeghi-ekweye;

7 nke unu onwe-unu jeghariri nime ha n’oge gara aga, mb͕e unu nādi ndu nime ihe ndia.

8 Ma ub͕u a unu onwe-unu, tupu-kwa-nu ihe ndia nile; bú iwe, ọnuma, obi ọjọ, nkwulu, ikwu okwu ihere nēsi n’ọnu-unu puta

9 unu ekwula okwu-ugha gwarita ibe-unu; ebe unu yipuchasiworo madu ochie ahu, ya na omume-ya nile,

10 yikwasi kwa madu ọhu ahu, nke anēme ya ka ọ di ọhu rue na nmazu dika onyinyo nke Onye kère ya si di:

11 ebe onye-Grik na onye-Ju, obibì-úgwù na ebìghi-úgwù, onye nāsu asusu ọzọ, onye Sitia, orù, onye nwere onwe-ya, nāpughi idi: ma Kraist bu ihe nile, di kwa nime madu nile.

12 Ya mere dika ndi Chineke rọputara, ndi di nsọ ndi ahuwo-kwa-ra n’anya, yikwasinu obi ebere, obi-ọma, obi di ume-ala, idi-nwayọ, ogologo-ntachi-obi;

13 nānagideritanu ibe-unu, were-kwa-nu amara b͕aghara onwe-unu, asi na onye ọ bula nwere ihe ita onye ọ bula uta; ọbuná dika Onye-nwe-ayi were amara b͕aghara unu, unu onwe-unu me kwa otú a:

14 ma n’elu ihe ndia nile yikwasinu ihu-n’anya, nke bu ihe-nkekọ nke izu-okè.

15 Ka udo nke Kraist nēkpezi kwa okwu n’obi-unu, nke akpọbata-kwa-ra unu nime ya n’otù aru; buru-kwa-nu ndi nēkele ekele.

16 Kwenu ka okwu Kraist were àkù-ya nile biri nime unu n’amam-ihe nile; werenu abù ọma na ukwe na abù nke Mọ Nsọ nēzírita onwe-unu ihe, nādurita kwa onwe-unu ọdu, nime amara enyere unu nābùnu abù nime obi-unu nye Chineke.

17 Ihe nile ọ bula unu nēme kwa, n’okwu ma-ọbu n’ọlu, nēmenu ha nile n’aha Onye-nwe-ayi Jisus, nēkele Chineke, bú Nna-ayi, site n’aka-Ya.

18 Ndi bu nwunye, nēdonu onwe-unu n’okpuru di-unu, dika ọ nēkwesi unu nime Onye-nwe-ayi.

19 Ndi bu di, hunu nwunye-unu n’anya, unu enwe-kwa-la obi ilu n’ebe ha nọ.

20 Umu, nāṅanu nti okwu ndi muru unu n’ihe nile, n’ihi na nka bu ihe nātọ ezi utọ nime Onye-nwe-ayi.

21 Ndi bu nna, akpasula umu-unu iwe, ka obi ghara ifù ha.

22 Ndi-orù, nāṅanu nti okwu ndi bu ndi-nwe-unu n’uzọ anu-aru n’ihe nile; ghara iwere ibu-orù-n’anya nāṅa, dika ndi nēme otú ọ gātọ madu utọ, kama n’afọ-ofufo, nātu egwu Onye-nwe-ayi:

23 ihe ọ bula unu nēme, nālunu ọlu site na nkpuru-obi-unu, dika unu nāluru Onye-nwe-ayi ọlu, ọ bughi kwa madu;

24 ebe unu matara na ọ bu n’aka Onye-nwe-ayi ka unu gānata ihe-nnyeghachi-unu, bú ihe-nketa ahu: unu bu orù nke Onye-nwe-ayi Kraist.

25 N’ihi na onye nēme ajọ omume gānaghachi ajọ omume ahu o mere: ile-madu-anya-n’iru adighi kwa.