1 Job we za, si,

2 Ọbuná ta nnupu-isi ka ntamum bu:

Akam di arọ́ n’ihi ize-umem.

3 Ọ gādim nọ̄ nma ma asi na amaram ebe m’gāchọta Ya!

Ma asi na agamabiaru ọnọdu-Ya guzosiri ike!

4 Ka m’do ikpém n’usoro n’iru Ya,

Meju kwa onum n’iru-uka.

5 Kam’mara okwu nile Ọ gāzaghachim,

Ka m’ghọta kwa ihe Ọ gāsim.

6 Ọ̀ bu n’uba ǹke ike-Ya ka O gēkpesom ikpe?

É-è; kama Ya onwe-ya gēchem iru.

7 N’ebe ahu ka onye ziri ezi nēso Ya ru uka;

Ewe me ka m’b͕apu n’aka Onye-ikpem rue mb͕e ebighi-ebi.

8 Le, m’ga n’iru, ma Ọ nọghi ya;

M’ga kwa n’azu, ma adighm-ahuta Ya:

9 M’ga n’aka-ekpe, mb͕e Ọ nālu ọlu, ma adighm-ahu Ya anya:

Ọ nēkpuchi Onwe-ya n’aka-nri, m’we ghara ihu Ya.

10 N’ihi na Ọ mawo uzọ m’nāga;

Mb͕e Ọ nwaputasirim, dika ọla-edo ka m’gāputa.

11 Nzọ-ukwu-Ya ka ukwum nējisi ike iso;

Uzọ-Ya ka m’debeworo, adighm-ewezuga kwa onwem.

12 Adighm-apu kwa n’ihe enyere n’iwu nke eb͕ub͕ere-ọnu-Ya;

Atukọbawom okwu nile nke ọnu-Ya kari òkèm.

13 Ma Ya onwe-ya nọ n’otù èchìchè, ònye kwa gechighari Ya?

Nkpuru-obi-Ya achọsiwo kwa ike, O we me ya.

14 N’ihi na Ọ nēmezu ihe bu òkèm:

Ma ọtutu ihe dika ihe ndia di n’aka-Ya.

15 N’ihi ya ka m’nāma jijiji n’iru Ya;

Anamaghọta, m’nātu kwa oké egwu Ya.

16 N’ihi na Chineke emewo ka obim lọ miri,

Onye puru ime ihe nile emewo kwa ka m’ma jijiji:

17 N’ihi na ekpochapughm n’iru ọchichiri,

O kpuchighi kwa oké ọchichiri n’irum.