1 Onye anābara nba ọtutu mb͕e ma ọ nēkwesi olu-ya ike,

N’otù ntabi-anya ka agētipia ya, ọ dighi kwa ngwọta di.

2 Mb͕e ndi ezi omume nāba uba kari, ndi ala-ha nāṅuri:

Ma mb͕e onye nēmebi iwu nāchi achi, ndi ala-ya nēze ume.

3 Onye ọ bula nke nāhu amam-ihe n’anya nēme ka nna-ya ṅuria:

Ma onye bu eyì nke ndinyom nākwa iko nāla àkù-ya n’iyì.

4 Eze nēji ikpé ziri ezi eme ka ala-ya guzo:

Ma onye nānara onyinye nākwada ya.

5 Nwoke nke nāgwa madu-ibe-ya okwu ire-utọ

Nāb͕asara nzọ-ukwu-ya nile ub͕u.

6 Na njehie onye ọjọ ka ọnyà di:

Ma onye ezi omume nēti nkpu ọṅù nāṅuri kwa.

7 Onye ezi omume nāmata okwu-ikpe nke ndi nēnweghi ike:

Onye nēmebi iwu adighi-aghọta ihe-ọmuma.

8 Ndi nākwa emò nāfuye ọku n’obodo:

Ma ndi mara ihe nēme ka iwe laghachi azu.

9 Ọ buru na onye mara ihe esoro onye uche-ya b͕agọrọ ab͕agọ kpe ikpe,

Ma o nwere ọnuma ma ọ chìri ọchì, izu-ike adighi kwa.

10 Ndi-ọbara nākpọ onye zuru okè asì:

Ma ndi ziri ezi nāchọ ọdi-nma nkpuru-obi-ya.

11 Mọ nile nke onwe-ya ka onye-nzuzu nēme ka ọ puta ìhè:

Ma onye mara ihe nēb͕ochi mọ-ya, nēme kwa ka ọ dajua.

12 Ọ buru na onye nāchi achi aṅa nti okwu-ugha,

Ndi nile nējere ya ozi bu ndi nēmebi iwu.

13 Ob͕eye na onye-nmeb͕u ezutewo:

Onye nēnye anya ha abua ìhè bu Jehova.

14 Eze nke nēkpe ndi nēnweghi ike ikpe n’ikwesi-ntukwasi-obi,

Oche-eze-ya gēguzosi ike rue mb͕e ebighi-ebi.

15 Nkpa-n’aka na iba-nba nēnye amam-ihe:

Ma nwata nke anārapu n’onwe-ya nēme ka ihere me nne-ya.

16 Mb͕e ndi nēmebi iwu nāba uba kari, njehie nāba kwa uba kari:

Ma ndi ezi omume gēlekwasi ọdida-ha.

17 Dọ nwa-gi aka na nti, ọ gēme kwa ka i zu ike;

E, ọ gēnye nkpuru-obi-gi ihe-utọ.

18 Mb͕e ọhù nādighi, ndi ala ahu adighi nchikọta:

Ma onye nēdebe iwu, ihe nāgara onye ahu nke-ọma.

19 Ọ bughi okwu agēji dọ orù aka na nti:

N’ihi na ọ bu ezie na ọ nāghọta, ma ọ̀ dighi ihe ọ nāza.

20 Ì huwo onye ọ bula nānukpọ onwe-ya n’okwu-ya nile?

Olile-anya diri onye-nzuzu kari onye ahu.

21 Onye zutọworo orù-ya site na nwata,

N’ikpe-azu-ya orù ahu gāghọ kwa nwa.

22 Onye-iwe nākpali ise-okwu,

Ọzọ, onye nēnwe ọnuma ri nne nējehie ri nne.

23 Npako madu gēme ka ọ di ala:

Ma onye mọ-ya di ala nējidesi nsọpuru ike.

24 Onye ya na onye-ori nēkekọ ihe nākpọ nkpuru-obi ya onwe-ya asì:

Ọb͕ub͕a-iyi ka ọ nānu, ma ọ dighi-egosi ihe ọ bula.

25 Egwu madu nēweta ọnyà:

Ma onye nātukwasi Jehova obi, agēme ka ọ nọ n’elu.

26 Ọtutu madu nāchọ iru onye nāchi achi:

Ma n’aka Jehova ka ikpé onye ọ bula nēsi bia.

27 Ihe-árú n’anya ndi ezi omume ka onye ajọ omume bu:

Ọzọ, ihe-árú n’anya onye nēmebi iwu ka onye ziri ezi n’uzọ-ya bu.