1 Madu ahu we mara aru Iv, bú nwunye-ya; o we turu ime, mua Ken, si, Enwetawom nwoke site n’iye-aka Jehova.

2 Ọzọ kwa, ọ mua nwa-nṅe-ya nwoke, bú Ebel. Ebel we buru onye nāzù ìgwè ewu na aturu, ma Ken bu onye nālu ọlu ubi.

3 O rue, n’ọgwugwu ubọchi ufọdu, na Ken wetara ufọdu nime nkpuru ala ibu onyinye-inata-iru-ọma enyere Jehova.

4 Ebel kwa, ya onwe-ya wetakwara ufọdu nime umu eburu uzọ mu nke ìgwè ewu na aturu ya, na ufọdu nime iberibe-ha mara abuba. Jehova we le Ebel, le kwa onyinye-inata-iru-ọma-ya, anya ọma:

5 ma Ken na onyinye-inata-iru-ọma-ya, O leghi ha anya ọma. Ken we we iwe di ọku nke-uku, iru-ya we b͕arua.

6 Jehova we si Ken, N’ìhi gini ka i nēwe iwe di ọku? ọ̀ bu kwa n’ihi gini ka iru-gi b͕aruru?

7 Ọ buru na i nēme nke-ọma, ọ̀ bughi nb͕asa-iru ka i gēnwe? ọ buru kwa na i meghi nke-ọma, n’ọnu-uzọ ka nmehie nāma-kpu dika anu-ọhia: ọ bu kwa n’ebe i nọ ka ọchichọ-ya di, ma ọ kwesiri ka gi onwe-gi chia ya.

8 Ken we si Ebel, bú nwa-nne-ya, Ka ayi je n’ọhia. O rue, mb͕e ha nọ n’ọhia, na Ken biliri imegide Ebel, bú nwa-nne-ya, we b͕ue ya.

9 Jehova we si Ken, Òle ebe Ebel, bú nwa-nne-gi, nọ? Ọ we si, Amaghm: ọ̀ bu onye-nche nwa-nnem ka m’bu?

10 Ọ si, Gini ka i meworo? ge nti! olu ọbara nwa-nne-gi nētikum site n’ala.

11 Ma ub͕u a, onye anābu ọnu ka i bu site n’ala, nke saghere ọnu-ya inara ọbara nwa-nne-gi n’aka-gi;

12 mb͕e i nālu ọlu ubi, ọ gaghi-enye gi ike-ya ọzọ; onye nāṅaghari na ọsọ ka i gābu n’uwa.

13 Ken we si Jehova, Ahuhu ajọ omumem di uku kari obubu.

14 Le, I chupuwom ta n’iru ala; ọ bu kwa n’iru-Gi ka agēzopum; m’gābu kwa onye nāṅaghari na ọsọ n’uwa; o gēru kwa na onye ọ bula nke nāhum gēb͕um.

15 Jehova we si ya, N’ihi nka onye ọ bula nke nēb͕u Ken, okpukpu asa ka agābọ ọ́bọ̀ n’aru ya. Jehova we doro Ken ihe-iriba-ama, ka onye ọ bula nke nāhu ya we ghara itib͕u ya.

16 Ken we si n’iru Jehova pua, biri n’ala Nod, n’Iru-anyanwu Iden.

17 Ken we mara aru nwunye-ya; ọ we turu ime, mua Inok: ma Ken nọ nēwu obodo, o we kpọ aha obodo ahu, dika aha nwa-ya nwoke si di, Inok.

18 Ewe mua Irad nye Inok: Irad we mua Mehujael: Mehujael we mua Metushael: Metushael we mua Lemek.

19 Lemek we lutara onwe-ya ndinyom abua: aha otù onye nime ha bu Eda, aha nwayi ibe-ya bu Zila.

20 Eda we mua Jebel: onye ahu bu nna ndi bi n’ulo-ikwū, ndi nwe-kwa-ra anu-ulo.

21 Aha nwa-nne-ya nwoke bu Jubal: onye ahu bu nna ndi nile nākpọ ubọ-akwara, nēb͕u kwa ọ̀jà.

22 Zila kwa, nwayi ahu mu-kwa-ra Tubal-ken, onye nākpu ihe-ọlu nile ọ bula nke ọla na nke ígwè: ma nwa-nne-nwayi Tubal-ken bu Neama.

23 Lemek we si ndinyom-ya:

Eda na Zila, nurunu olum;

Ndinyom Lemek, genu nti n’okwu-ọnum:

N’ihi na nwoke ka m’b͕uworo n’ihi ob͕ub͕u-mmam,

Ọ bu kwa nwata-nwoke ka m’b͕uworo n’ihi ubiri-utarim:

24 Asi na ọ bu okpukpu asa ka agābọ̀ Ken ọ́bọ̀,

Agābọ kwa Lemek ọgu okpukpu atọ na iri na asa.

25 Adam we mara aru nwunye-ya ọzọ; nwunye-ya we mua nwa-nwoke, kpọ aha-ya Set, si, N’ihi na Chineke doworom nkpuru ọzọ n’ọnọdu Ebel; n’ihi na Ken b͕uru ya.

26 Set kwa, ya onwe-ya ka amu-kwa-ra nwa-nwoke nye; ọ kpọ aha-ya Enosh: mb͕e ahu ka amalitere ikpọku aha Jehova.